Katuluyhon, Sa Diin Ka?

9 October 2020

Ang huni sang tiki, paka, kag tuko bati-on
sa malinong kag matugnaw nga kagab-ihon.
Maski sa pagpangurumbot ko sang habol,
bati-on ang upas sang kuring nga garinungkadol.

Pilit ko man nga ipiyong ang akon mga mata,
ang kuba-kuba sang dughan ko nagalinagumba.
Kabudlay magtulog kag ako man naga-aliwasa
kag ang pinsar ko wala diri kay galuyong pa.

Indi matakos ang tubig kag gatas nga nainom ko.
Padayon pa gid ang pagbaliswa sa wala kag tu-o.
Isa na ka gatos ang naisip ko nga mga karnero,
apang wala ko pa nalab-ot ang akon katuyo.

Ang mga ambahanon nga yari sa akon pinsar,
nagapatikab sang bibig ko kag indi ko maibitar.
Ang katuluyhon tani akon man nga maimbitar.
Sa katre yari na ako, handa na kag nakaplastar.

Padayon ang akon paglaghap sang katuluyhon.
Gusto ko na gid magpahuway kag magpiyong.
Gasamu na ang luha ko kag akon nga sip-on.
Kabudlay gali magtulog kun may ginapanumdom.